martes, 2 de junio de 2015

La gaita gallega, instrumentu tradicional asturianu (y II) - La gaita de Paco

Vien d'equí.

El Valledor, Ayande


Esta gaita cola que toco ye propiedá de los mios amigos Francisco Álvarez y Carmen Iriarte, de Casa Paco, n’Eiros (Tinéu). Foi puesta a puntu por Chus Solís.

Foto: Chus Solís

Paco
Paco lleva más de cincuenta años n'Eiros, pero nació en Cova, un pueblu d’El Valledor (Ayande), y nos años cincuenta del sieglu XX mercó-y esti instrumentu a un gaiteiro d’Ernes (Negueira) que taba de pasu en Samartín, cabeza de la parroquia veya a la que pertenez Cova. Lleva  más de sesenta años con ella, y sigue tocándola, delles veces acompañando a la so muyer Carmen, mui bona cantadora y mui bona conocedora del repertoriu tradicional d'Iboyu (Ayande), onde nació. Carmen protagonizó en 2008 un capítulu del programa Camín de Cantares.

Rubieiro, na parroquia veya d'El Valledor (Ayande)

La gaita paez que tien pieces de distintos facedores. El roncón tien la marca de la casa de música Manrique Villanueva de Vigo y foi fechu por Antonio Represas, «O Marreco», de Ponteareas (Pontevedra). 

Foto: Chus Solís

Foto: Chus Solís
El punteiro ta mui arregláu, probablemente por ferreiros,  y nun paez del mesmu facedor. Tien troneres simétriques y un aire al torniáu de delles gaites eonaviegues, pero tanto si ta fechu n’Asturies como en Galicia ye evidente que ye un punteiro mui vieyu de tipu gallegu que funciona con payuela llarga. Nun responde al tipu gallegu modernu qu’hoi llamamos estándar, pola so antigüedá y porque la escala presenta una subtónica que-y da un soníu mui arcaizante. 

Les gaites de tipu gallegu  llegaron al suroccidente d’Asturies y a la montaña oriental de Lugo hai munches décades yá, desplazando gradualmente al tipu tradicional de la zona, requintador y de dixitación zarrada. Esta gaita ye anterior a los modelos modernos más comunes hoi en día, pero recuérdanos qu’estos instrumentos son yá una parte irrenunciable del patrimoniu musical asturianu. Nun se pue entender nin disfrutar plenamente la música tradicional asturiana ensin gaites gallegues, y nun toi falando namás de les modernes, tamién d'ayalgues vieyes como ésta. 

Pongo otru vidiu. Igual qu'el primeru, foi grabáu por Óscar García nel palaciu de los Peñalba, na Puela (Ayande). Esti tien color sepia pa esperimentar un poco. Si llego a poner boina y quitar los playeros, igual asonsañaba bien l'añu 1950. 

Ye una mazurca recoyía en Monón a Fermina: Úa truita se paseaba/Del río para a presa/Muitas cosas fai un home/que coel tempo ye pesan. Podéis escuchar otra versión de la mesma pieza pinchando equí. Más nada. Que vos preste.

No hay comentarios:

Publicar un comentario