miércoles, 4 de junio de 2014

Divagación: Tocar coherente, tocar simple


Dos cosines

1- La importancia de tocar, lo primero, coherente.

Hai que tocar afinao, medío y claro, sí, pero lo primero de too ye tocar... coherente. 

Decide qué vas tocar, y que sea coherente cola tradición. La técnica tien qu'adaptase: nun pues tocar igual una muliñeira d'Ibias y una llixera de la cuenca'l Nalón. Y si ye un amiestu pieces, tien que ser obligatorio facelu con música d'una misma zona xeográfica y cultural. Nun puedo tocar un arroubáu del conceyu Valdés y empatalu col corri-corri. Tampoco puedo meter una alborada en medio d'una jota y una muñera, nun tien sentíu nun contestu tradicional.

Relacionao con esto, dicir que nun entiendo la manera de construir los sets que tienen agora munches bandes de gaites asturianes. Personalmente, suéname incoherente munches veces. Sospecho que tien muncho que ver cola so participación en concursos, tanto n'Asturies como en Galicia. Esos concursos piden unos sets con unes estructures cerraes que nun esixen coherencia xeográfica nin musical. Cuando escucho esi tipu d'arreglos pensaos pa concursos, nun puedo evitar sorprendeme polos non sequitur. Delles veces ye como si cambiaren d'un ritmu pa otru sólo porque toca, porque lo manden les normes. O paren toos y de sópitu da un pasu palante un gaiteru solista pa tocar una en mou menor, porque dicen les normes que ye obligatorio tocar una en mou menor... 

Con esto de les bandes, molaba más que copiaren les normes de los concursos bretones. Los bagadoù tienen que facer sets de música tradicional pa baillar d'un territoriu (Bro) determináu. Tamién pueden meter pieces non baillables, pero ensin pasase. Eso da-y coherencia y sentíu a tolos arreglos que faen. Y atrévome a decir que ye mui inspiradora esa manera de trabayar de los bretones, pensando de qué Bro van sacar el repertoriu y respetando con ciñu la "baillabilidá" de lo que van tocar.

Pero claro, yá lo sé, n'Asturies tenemos conceyos, nun tenemos una división en Broioù... ¡pero podíemos inventala! 

Exemplu: Voi facer un set del país (inventáu por mí) Sierra de Cuera, que taría formáu por Cabrales y Llanes. Entamo con un cantar de la h.oguera d'un pueblu llaniscu, sacáu del discu del Cuarteto Cea. Detrás va lo de baillar: una jota de Manolo Rivas, una gallegada que tocaba Ignacio Noriega y otra gallegada más recoyía por Alan Lomax en Sotres. Y quedo tan anchu. Coherente.


2) Trabayu, esfuerzu y dificultá nun tienen nada que ver cola calidá musical. 

Requintos, cromatismos, intervalos raros, dificultá interpretativa máxima... y el públicu tará aburríu y agobiáu. Agora, eso sí, toques una piecina sencillina con bon gustu, y queda tol mundu encantáu. Ta claro que nun fai falta complicase, ye contraproducente. 

La mayor parte de músicos tradicionales del mundu nun tienen el conceptu de "pieza difícil" o "pieza fácil" que tenemos equí n'Asturies. Por exemplu, los gaiteros d'Irlanda, Bretaña, Escocia, Galicia o Italia nun xerarquicen el repertoriu en fáciles y difíciles. Simplemente toquen la so música lo meyor que pueden, intentando facelo lo más guapo posible. Hai pieces guapes y fees, y yá ta. Si yes un musicazu tremendu, va notásete igual o más tocando pieces guapes y formalmente simples que tocando bodoques infumables. Eso n'Europa. Pero nosotros non, paez que sólo triunfa'l virtuosismu vacíu. El másimu esponente son eses pieces compuestes pa concursos, enllenes de cromatismos y requintos absurdos, que nunca gustaron nin gustarán a naide. Eses composiciones convierten la gaita nuna patética parodia de clarinetes y oboes. Y de paso insulten a la nuestra música tradicional escudándose nuna pretendida "evolución" o nun sé qué rollos. Bodoques. Estes pieces son bodoques. 

Col tema los arreglos pasa lo mesmo. Meter más instrumentos, voces y fuegos artificiales nun meyora necesariamente los resultaos musicales. ¿Pasaste tres años componiendo la to obra pa gaita y orquesta, y agora llego yo y toco un par de saltones con gaita y  pandeiru y resulta que-y gusta más a la xente? Pues asina ye la vida. L'esfuerzu y la complicación nun son necesariamente positivos.

La gaita ye un instrumentu que principalmente toca un tipu de música: la so música tradicional. Nun faen falta "evoluciones" rares del repertoriu nin de la técnica. Lo que sí fai falta ye más amor, respetu y conocimientu fondu del repertoriu tradicional.
Y más música simple tocada ensin complicaciones nin distorsiones.

Voi ver si me lo aplico pa la siguiente entrada que voi meter.

1 comentario:

  1. Bones reflexiones, la coherencia ye per importante pero premero tenemos qu'entamar col enstrumentu, también necesita de la coherencia hestorica y musical que se merez. Anguaño usamos gaites bien poco coherentes col repertoriu e usu; la afinación del punteru, les postures cruzades que obvien la organoloxía propia, los modos, encluso la estéutica del mesmu estrumentu son como mínimo poco coherentes. Prestabame ver na música tradicional el mesmu rigor pal estrumentu y repertoriu tal como los faen los interpretes de música antigua, de xuru depende de nosotros mesmos: estudiu, análixis y debulgación.

    Facer música tradicional ye dalgo funcional que güei aún tien sitio y que tenemos que caltener, pero ye inevitable ciertes transformaciones o mutaciones de autor-transmisor a interprete ("intrepete", como dicía un maestru miu), el culto al virtuosismo y la sede d'aplauso finen colo social pa dar paso al artistismo (como dicía Hevia "artistritis") sabiendo discernir andaremos el camín (aunque sella paralelo) coreutamente.

    Tien mucho esti post qu'espublizaste pa ldebate y la refexón, anímote a paticipar nel Foru de la gaita del facebook donde mas xente puea participar.
    Chus Solis

    Foro de la gaita de la Península Ibérica y las Islas Baleares
    https://www.facebook.com/groups/277332155769725/


    ResponderEliminar